تعلمني الــ,,,ـــناعه

[size=25]السلام عليكم ورحمة الله وبركاته

حقيقة خطرت في بالي فكرة ..

انو حنا تكلمنا عن الاتيكيت قبل كذا صح!

طيب ليه ما ننظر لها بنظرة خليجية شوية ..

ونشوف اتيكيتنا ..كيف رح يكون ..

اللي هي بالعامي كذا ” السناعة ” ..

انا بالنسبة لي ..في حياتي الشخصية

ما عندنا السناعة وكذا ..

لأنه بكل بساطة كنا كلنا بنات واخوات ..

وقليل مرة اطلع طلعات يعني فيها حريم كبار وكذا

كل طلعاتي وعلاقاتي كانت ميانة في ميانة ..

فوصلت لمرحلة من عمري الرد والمجاملة ع الناس

كانت عندي zero ..!

يعني مثلا اذا جاكي احد البيت كيف تهلين فيه؟

هلا والله وغلا ……………………….. اوقف ..وش بعد؟

ابسط القواعد كنت افهي عندها ..

طبعا هالكلام قبل 5 سنوات تقريبا ..

كبرنا وكبرت الدنيا ..

وهنا رح أسهل ع اللكل ونحط دليل للسناعة ..

———

جيتي واعطيتي احد كأس موية ..

قال لك : عشـتِ

تقولين : …. ( عاشت أيامك)

———

صحيتي من النوم

متأخر وجا احد

قال لك : صح النوم

تقولين : ….( صح بدنك)

———-

التعرف على العائلة

جا وقال لك احد وش عائلك ..

تقولين عائلتك..

يقول لك : والنعم فيك ..

تقولين : ….(ما عليك زود)

———

شخص رح يبارك لك

يقول : مبروك ..

تقولين : الله يبارك فيك وعقبال عندك ..<لو لسه ما حصل له

———-

شخص تزوج

تقولين له/ا :

ألف مبروك الله يجمع بينكم بالخير
منه المال ومنك العيال
الله يبارك لك بزوجك وبيتك
الله يسعدك ويهنيكي ويرزقك بالذرية الصالحة
الله يعمر حياتكم بالمحبة و المودة

———-

وحدة توها خلفت بيبي

تقولين لها :

الحمد الله على سلامتك وألف مبروك
الله يجعله من مواليد السعادة
يتربى (فلان/ة) بعزكم ان شاء الله
الله يرزقكم بره ويسخره لكم
الله يجعله من الصالحين ويحفظه لكم من كل عين..

———

وحدة تعبانة ومريضة

تقولين لها :

الله يشفيك ويعافيك ويرجعك لبيتك بالسلامه
وان شاء الله العمر الطويل يارب
وترجعين لنا بالصحة والعافية وأحسن من أول ..
والله يجعل مرضك تكفير لذنوبك وتعظيم لأجرك
ما تشوفين شر ..وان شاء الله تقومين بالسلامة

———

حالة وفاة لأحد و تبين تواسينهم

تقولين :

عظم الله اجرك
انا لله وانا اليه راجعون
الله يرحمه/ا ويغفر له/ا
ويجعل قبره/ا روضه من رياض الجنة
امين يارب العالمين
الله اغسله بالماء والثلج والبرد
ونقه كما ينقى الثوب الأبيض من الدنس
(وأدعية كثيرة)

———-

احد دخل بيتك وتبين ترحبين فيهم

تقولين :

هلا وغلا ..

اسفرت وانورت ياالله ان تحييهم

وتبقيهم وتمسيهم بالخير وتصبحهم بالسرور

تو ما نور البيت ..تفضلوا تفضلوا ..

———-

طيب اللحين دخلوا الناس عندك في البيت

لازم ترحبين فيهم زي ما ذكرنا ..

و كيف اللحين نضيفهم :

أول شيء تقدمين لهم

-العصيرات ..}

كوكتيل , و عصير طبيعي ..

طبعا غيروا في العصيرات عشان ممكن مو

اللكل يشرب مثلا برتقال ولا اللكل يشرب تفاح ..

فلازم التنويع ..

تأكدي أنهم كلهم شربوا ..ولزّمي عليهم ..

واذا خلصوا ..

يبدأ المرحلة الثانية من الضيافة ..

-القهــوة …}

في شيء مهم عند القهوة ..

أول شيء لازم لازم لازم يكون معها تمر

<مع أني ما أحب التمر ودايم أكله مغصوبة..

الشيء الثاني يا بنات ..

انو في ناس عندهم عادات وتقاليد

مثلا القهوة اذا جيتي تصبينها يا حلوااا

امسكي الدلة من اليسار والفنجال بيمينك ..!!

وعبي نص الفنجال أو أقل من النص بشوي ..!

لأنه بعض الناس اذا صبيتي لهم الفنجال مليان

معناتها عندهم (إطلعوا برى بيتي ) ..كأنها طردة !

متخيلين يعني الموضوع مو لعب

ولا تضحكون ترى في ناس كذا الإ الآن ..

خصوصا الشيبان والعجايز ..

والرجال اعتقد يهتمون بها الامور ..!

تعرفون وش ألعن موقف لما تصبين قهوة

وماسكة الفنجال وهي حارة بيدك ..!!!!!!

ويجلسون يسولفون يسولفووون

وأنتي تقولين تفضلي خالتي ..تفضضضضضضضضضضلي

تفضلي يدي حرقتني وجععععععععععع هههههههههههههههههه

ولما تقدمين الضيافة مو كلكم تروحون المطبخ

لازم احد يجلس مع الضيوف ..!

ما ينفع يطولون لحالهم ..

لا تنسون تحطون حلى مع القهوة

ان شاء الله اللكل عارف هالاشياء ..

في حاجة كمان حابة اقولها ..

انو انا لي طريقة اسويها بالقهوة

بما إني مزاجي قهوة !! وأكيف عليها ..

فطلعت بخلطة إكتشفت بعدين انه في ناس

كثير يستعملونها ..

وخالتي ادمنت ع قهوتي ههههه

وحبوها كثير ..

عاد أمي تقول عيب تقدمين قهوة زي كذا

قلت ليه وشفيها ؟!!

قالت لونها فاتح ..ما يصير القهوة يفتح لونها مرة ..

المهم انا ممنوعة من أني اسوي قهوة للناس

مع اني عارفة رح تعجبهم ههههههههه

ما فرقت ع لون يعني ..

الطريقة الله يسلمكم

أعبي ثلاث أرباع الوعاء حق القهوة ..موية ..

و ملعقتين كبار الى 3 ملاعق بن ..!

وملعقة حليب ..

ونص ملعقة نسكافيه ..

نتفة زنجبيل ..!! ريحة الزنجبيل حتى ..

وأحط بالدلة ملعقتين هيل …!!

وأصب عليها القهوة بعد ما تركتها

تغلي وتغلي وتغلي ..

ياما نسيتها وهي تغلي ..تاخذ راحتها

من نص ساعة لساعة ..براحتك يعني

وتطلع يمي يمي ..قهوة تحفه ..

طيب نرجع مرة ثانية للضيوف ..

المرحلة الثالثة ..

- الشــاي ..}

ممكن تسوين إبريقين ..

واحد للشاي والثاني للنعناع ..

اذا ما تعرفين إيش يحبون الضيوف

يفضل تخلين السكر برى ..

عشان هم يضيفونه بنفسهم ..

اذا رح تحطون العشاء بدري ..

خلوا الشاي بعد العشاء ..!!

عشان يصير في شيء تضيفون عليه بعد العشاء..

التعامل مع الضيوف :-

دايم حاولي تاخذين وتعطين مع الضيوف لو كانوا جايين عندك إنتي شخصيا..

لو كنتي بنوتة ..يفضل تكونين ع السايلنت لين أحد يبدأ يتكلم معك ..

السايلنت يعني بأدب ولطف و حياااااااااء أكرر حيااااااااااااء

و الحياء ما يمنع انك تكونين مضيافة وتسولفين شوي ..!

سوي آي كونتاكت مع ضيفتك لو إنتي بنوتة خصوصا لو كان عندها عيال شباب

هههههههههههههههههههههههههههههههههههههههه

يمكن تعجب فيكي وتخطبك ..!

فلازم تسوين تخاطر معها ” أبي ولدك ” ” أخطبيني” ” خذيني ”

لوول دايم الأمهات يحشون في عيالهم عند الحريم

“والله وليدي مسيكين معذبته جامعته ليل نهار يدرس“<الولد طموح سوي معها آي كونتاكت

“ودي يكبر ويعقل ” <هذي لا تسوين معها آي كونتاكت هههههههههههه

طبعا أمك لازم تسوي حركات البهارات

تقول بنيتي تستحي خجولة .. كلامها قليل

هذا حلى بنتي سوته ههههههههه

طبعا الحلى من سعد الدين ولا القباني من قوة النصب صار حلى بنتها

طيب خلاص الجزء اللي بعد حركات البهارات سووا له ( shift + delete)

خليكي ع شخصيتك ..بس أكيد ما تصيرين بجحة ..

يعني مرة جريئة ..داخلة جو مع سواليف الحريم ..!

خلهم يسولفون انتي بريئة ما تعرفين وش يقولون

واذا ناديتي وحدة كبيرة مرة يعني فوق 70 ..قولي خالتي ..

في ناس ما تحب أحد يناديها خالتي او يكبرها في العمر ..

ممكن تقولين “أم فلان” سمّي ..تفضلي ..عيوني

آمري ؟ ..لبيه ؟ ..

تبينها تكمل السالفة قولي (إسّلمٍي )

كلمات إنسيها من قاموسك عند الضيوف :

(بليز -اوكي - سوري- يب -نو -@#$@#$ كل انواع الشتائم)

كلمات تتحول بقدرة قادر :

يماااا ——-> أمي ..

فطيم/حصيص/منيرّ/نويرّ ——->فاطمة/حصة/منيرة/نورة

جيبي لنفسك ما عندك رجلين —–> من عيوني أجيبها

مابي ——-> تآمرين آمر

قولي قسم —–>صحيح ؟

كذابة /نصابة ——>تمزحين أكيد؟

وإن شاء الله يكون الدليل مفيد للكل والبوست مفتوح للإضافات ..

إضـــافات المتابعين :-

Menox :
-احنا (القبايل) اللي ما نعبي الفنجان.
-الحضارم لازم يعبوا الفنجان كدليل على الكرم و الترحيب.
-الشاهي .. احنا نحطه مرتين .. قبل العشا شاهي عادي و براد ثاني نعناع و معاه معجنات خفايف ، و بعد العشا شاهي أخضر.

Ro0oRy:
-لما تروحي لناس ويقدمون لك بخور تقولي طيب الله فالك وخلالك احبابك.
-لما تزورين احد وجيتي بتطلعين وقالك لسى بدري تقولين الجلسه معكم ماتنمل والله يجمعنا في جنات النعيم.
-في الزواج لماتقولك عقبالك تردين وتقولين تسلمين.
-حلو لما تكثري من الدعاء للي انتي زايرتهم مثل انعم الله عليكم وكثر الله خيركم.
-ما يجيبلك مويه تقولين يارب يسقيك من حوض النبي.

[/size]

شكراااااااااااا احــــــــلا موضوع

مرورك احلى

منووووووووور الموضوع